ACCIONISTAS

 

A ENERXÍA QUE MOVE GALICIA

O interese público, o arraigamento en Galicia, o coñecemento do sector enerxético e a solvencia financeira de carácter internacional son os trazos que definen o noso accionariado.

O Goberno de Galicia, coa súa participación do 24,31 %, pon de manifesto que somos unha compañía estratéxica para o desenvolvemento da comunidade.

O Grupo Tojeiro, impulsor do proxecto, suma o 50,69 % do capital por medio das súas sociedades Gadisa e Forestal do Atlántico. Achega arraigamento e dinamismo como corporación líder no noroeste ibérico.

Sojitz Corporation, titular do 15 %, é un actor de primeiro nivel que desenvolve operacións comerciais en todo o mundo.

Sonatrach, empresa pública alxeriana cunha vasta experiencia no sector dos hidrocarburos, conta cunha participación do 10 %.

O NOSO PRESIDENTE

José María Paz Goday, que desempeña a Presidencia de Reganosa desde decembro de 2012, naceu na Coruña en 1949. É enxeñeiro industrial pola Universidade Politécnica de Madrid.

Iniciou a súa carreira profesional no sector das telecomunicacións e está vinculado desde 1975 ao sector enerxético, no que asumiu importantes responsabilidades tanto no ámbito da empresa como no dos organismos internacionais.

En Unión Fenosa, José María Paz exerceu como secretario xeral de Regulación, cargo ao que foi promovido desde o de director da devandita Secretaría Xeral. Na mesma compañía tamén foi xefe do Departamento de Estudos, director de Coordinación da Explotación e director de Acción Internacional de Xeración.

Participou na creación de Rede Eléctrica de España, a empresa que xestiona a rede de alta tensión, desde a Secretaría Técnica de Aselectrica, antecedente sectorial da compañía. En Rede Eléctrica de España desempeñou a Dirección Xeral de Explotación durante 10 anos. Anteriormente asumira labores relevantes: director de Operación e Análise da Explotación e director de Planificación da Rede.

No ámbito internacional, José María Paz prestou servizos destacados en organizacións do campo enerxético. Destaca a vicepresidencia, a presidencia e a presidencia do Comité Restrinxido da Unión para a Coordinación da Produción e o Transporte da Electricidade (UCPTE) e Chairman da sección Market Structure and Regulation de Eurelectric, representación do sector eléctrico ante a Comisión Europea. Así mesmo, foi membro do Professional Consultative Committee on Electricity, para asesorar a Comisión Europea, e da Task Force TransEuropean Networks.

Colaborou como docente coa Escola de Organización Industrial.