Por primeira vez na historia da compañía, os ingresos procedentes da actividade fora de España superan un terzo dos totales
O grupo enerxético colaborou xa con medio cento de clientes en catro continentes
O Grupo Reganosa afianza a súa internacionalización. Xa suman 30 os países onde operou, tras recibir o encargo, nas últimas semanas, de analizar a viabilidade dunha planta de licuefacción de gas natural nun punto da costa asiática. Non en balde, por primeira vez na historia da compañía, os ingresos procedentes do exterior supoñen máis dun terzo dos totais, segundo datos ao peche de 2024. Alemaña, Croacia, España, Francia, Grecia, Italia, Malta, Polonia e Portugal, en Europa; Angola, Ghana, Nixeria, Senegal, Serra Leona e Sudáfrica, en África; Bangladesh, Filipinas, Hong Kong, India, Kuwait, Malaisia, Paquistán, Timor Oriental e Vietnam, en Asia; e Brasil, Canadá, Chile, Colombia, México e República Dominicana, en América. Ata a data, esa é a lista de países nos que o grupo enerxético español desenvolveu actividades desde que fai case dez anos abriuse ao mundo.
Naquel momento (outubro de 2015), constituíu Reganosa Servizos para achegar o seu coñecemento e experiencia no deseño, execución e xestión de activos do sector. Desde entón, xa mereceu a confianza de 51 clientes en catro continentes e cubriu todas as fases do ciclo de vida dun proxecto, desde os estudos preliminares ata a operación comercial.
En virtude dese proceso de crecemento sostido e constante adaptación, Reganosa practicamente triplicou o seu persoal no último lustro. Así mesmo, consolidouse como referente mundial no mantemento e operación integral de infraestruturas enerxéticas de terceiros.
No ámbito do gas natural licuado, ademais de operar a súa propia en Mugardos (A Coruña), o grupo é adxudicatario da xestión de tres tipos de terminais: totalmente á boia, as de Brünsbuttel (Alemaña) e Tema (Ghana); completamente en terra, a de Oristano (Italia); e mixta, a de Delimara (Malta). Son instalacións, ademais, cun amplo rango de almacenamento: desde os 9.000 ata os 300.000 metros cúbicos.
Ata o momento, Reganosa Servizos gañou contratos no exterior valorados nun global de 186,3 millóns. Acompañou aos clientes no desenvolvemento e despregamento dos seus proxectos enerxéticos e estratexias de investimento, grazas ás súas capacidades internas, tanto como xestor de infraestruturas propias como pola exposición ás diferentes contornas nos que opera, así como ao desenvolvemento e despregamento de ferramentas dixitais aplicadas. Ese continuo desenvolvemento de capacidades internas permitiulle ademais estender os servizos a outros vectores de transición enerxética, como é o caso do hidróxeno, o amoníaco ou o biogás.
